గమ్యం లేని బాధ

 అంతు లేని అభిమానం ప్రేమయితే,

చేరలేని గమ్యమే కోరికైతే ,

కన్నీటి ప్రవాహమే ప్రయాణమవుతుంది ..

క్షణ క్షణం మోయలేని భారమైనా..

గమ్యం ఎరుగని బాధ శ్వాసలా మారి..

నీ జ్ఞాపకాల ఉనికికై పోరాడుతోంది..

నిస్వార్థమైన ప్రేమ నీ ఆనందమే కోరింది ..

కన్నీరు నిండిన చిరునవ్వుని .. 

కపటం ఎరుగని మనసు .. ఆనంద భాష్పాలుగా భ్రమ పడుతోందా ..

లేక ఇంకెంత ప్రేమ అందించ గలనో అని ఆరాటపడుతోందా ..

ఒరేయ్ మనిషీ .. చచ్చిపో ..

------------------------

నిగ్గదీయి సమాజాన్ని .. సిగ్గులేని శిలాజాన్ని..

నీతి దానికి పడదు .. నిస్వార్ధాన్ని నిలవనీయదు ..
దానికి కావలసింది స్వలాభం .. అసలే పట్టదు వసుదైక కుటుంబ భావం ..

నీతిలేని మొఖాలు.. జాతి గూర్చి బీరాలు ..
నేతి బీర చందాలు .. వీరిచ్చే అభయాలు ..

నా కులమంటాడు .. నా మతమంటాడు ..
అసలు నువ్వు మనిషివే కానపుడు .. ఎందుకా కుల మత తోకలు ..

తోకలున్న జంతువులు కూడ .. మానవత్వం చాటుతుంటే ..
మన తత్వాన్ని ,మనకి తిరిగి బోధిస్తుంటే..

నేటి మనిషి , తన తత్వమైన మానవత్వాన్ని వీడి ..
మృగతత్వాన్ని ఆచరిస్తూ .. ముక్కుతూ మూలుగుతున్నాడు ..

ఖ్యాతి గడింపలేని మూర్ఖులు ,నేర్పు గ్రహించలేని మూఢులు ..
తోడ్పాటు నివ్వలేని మానవ వ్యర్ధాలు వీరు .. మన సమాజాన్ని అసలెలా ఉధ్ధరించగలరు ..

మనమే కదలాలి .. ఈ పరిస్థితి మార్చాలి ..
భావ దారిద్ర్యాన్ని వీడి .. బావి తరానికి పునాదులు నాటాలి ..

రండి కదులుదాం .. దిశానిర్దేశం చేద్దాం ..
లేదా ఇలాగే నిస్తేజం గా ఉండి పోదాం ..

ఎలా ఉన్నా మేమే గొప్ప అని పొగుడుకుంటూ ..
ఆ శిలాజాల భావజాలాన్ని శిరసుపై మోసుకుంటూ , మన చితి మనమే పేర్చుకుంటూ .. 

నేటి మన సమాజంలో , మనుషుల మధ్య ఇన్ని సాంకేతికంగా మెరుగైన అనుసంధాన సాధనాలు ఉన్నప్పటికీ , మనసుల మధ్య చాలా దూరం పెరిగిపోతోంది , కారణం , మనం దేనికి ప్రాముఖ్యత ఇవ్వాలో గ్రహించలేకపోవడం ..

ఇంకొంచెం లోతుగా ఆలోచిస్తే , మన కోణంలోనే ఆలోచిస్తూ , ఎదుటివారు కూడా మన ఆలోచనలకు అణుగుణంగానే ఉండాలని అపోహపడటం చాలా సందర్భాలలో మన అసహనానికి కారణం అవుతుంది మనకు తెలియకుండానే ..

ఇలా ఆలోచించడానికి చాల కారణాలున్నాయి , అందులో మొట్టమొదటిది , మనమే గొప్ప అనే భావన .. మిగిలిన కారణాలు విశ్లేషిస్తే , మన మాటే నెగ్గాలనే వాంఛ , స్వార్థం అని ఇట్టే అర్థమైపోతుంది

ఎటొచ్చీ , ఇది మనకు మనం తెలుసుకోడానికి కొంత సమయం ఈ విషయం గురించి ఆలోచించడానికి కేటాయిస్తే మనకే సమాధానం దొరుకుతుంది కానీ మనకి ఇలాంటి అవసరమయిన చిన్న విషయాల మీద ఆలోచించే అవసరం విలువ తెలియకపోవడం ఒక బాధాకరమయిన వాస్తవం ..

మంది సొమ్ము , మనకే సొంతంబు .. మరిగి తినేందుకు మనకేల మానాభిమానము ..
నేటి రాజకీయనాయకుల ప్రతాపానికి అది ఒక కొలమానము ..

సిగ్గేల ఎగ్గేల , సిరి నుంచి దానిని కట్టే పురి దాకా కాదేదీ అవినీతి కి అనర్హము ..
ఎంత అవినీతి చేస్తే అంత పేరు , ఎంత అన్యాయం చేస్తే అంత కీర్తి ..
ఎన్నాల్టికి తీరేను ఈ రాజకీయ నాయకుల అవినీతి దాహార్తి ..

గొడ్డు తినే గడ్డినుంచి , బొడ్డు కోసే చోటు నుంచి ..
మడ్డి పిసికే వాని నుంచి , మిద్దె కట్టే వాని నుంచి ..
ఎవడైతే నాకేంటి , నా చేయి తడిస్తే చాలనే లుచ్చాలున్నంత వరకు ..
మన గతింతే , మన గమనం అంతే ..

మనమే కదా దానికి కారణం ..
మనం ఎన్నుకునే నాయకులే కదా ఈ దారుణాలకి మూలం ..
మనం మారనంత వరకు , మన తీరు మెరుగవనంత వరకు ..
ఎదుగుండదు , బొదుగుండదు .. ఎదిగేందుకు తోవుండదు ఈ రాబందుల రాజ్యంలో , రక్కసి మూకల కూపంలో ..

రా .. మెరుగై , మెరుగైన సమాజానికై , కదం కలుపు , పదం కలుపు .. ఎదిగేందుకు మడమ నిలుపు ..
రా .. ఉరుమై , మెరుపై .. అంతకీ వీలవనపుడు , పిడుగై , పిడిగుద్దై .. పిడికిలి బిగించి .. హక్కులకోసం పోరాడు .. నీతి నియమాల కోసం నివురై .. నీ జాతి ఋణం కొంతైనా తీర్చుకో

* అవమానవత్వం *

తోటి మనిషికి ఊతమివ్వరు, నూతి కప్పలు ఓటి బ్రతుకులు
సాటి వారికి సాయమవ్వరు, అసూయ నిండిన అనసూయపుత్రులు
...
తన విధి తాను చేయటానికి లంచం, అది అందితే లేదంతకంటే మంత్రం
తన శోధన అవకాశం కోసం, పరుల సొమ్ములోకి పరకాయ ప్రవేశం

అతి తెలివి మీరి ,అసలు తెలివి మరచి
స్వార్ధార్జనలో మునిగి ,మురికి కూపంలో మూలుగుతున్నారు

అంతిమ విజయం న్యాయానిదే అని తెలిసీ, ఈ అతి తెలివి మనిషి మళ్ళీ అవినీతికే ఓటు వేస్తుంటాడు , వితండ తర్కాలు మోస్తూ

నేటి మనిషిలో మానవత్వం , నేతి బీరలోని నేతి చందం
నీతి శూన్యం,జ్ఞాన రహితం,పేరు ఘనం,అభిమతం అధమం

అవివేక సామ్రాజ్యానికి అతనే మకుటంలేని మహారాజు..

అతడిని చూసి జాలి పడదామా ? గేలి చెద్దామా ? లేక ఏదో ఒకటి చేసి దారిలో పెడదామా ?

ఈ 'అవమాన'వత్వం వీడి , కనీసం 'ఆదిమానవ'తత్వం ఆచరిద్దాం

కదలండి , అమ్ములపొదిని ఆసాంతం నింపుకొని
వదలండి , రొమ్మువిరిచి ధైర్యపు చాపాన్ని
విరచండి , అవినీతి చేపల వెన్ను వెయ్యి వ్రక్కలుగా
గెలిపించుకోండి , జన్మనిచ్చిన మన వేదభూమి అంతిమ తత్వాన్ని , విశ్వమానవ సౌభ్రాత్రుత్వాన్ని ..

సర్వ జన మంగళం ,సకల శుభదాయకం , వికల భావ నాశనం , అభినవ అద్వితీయ శకమారంభం ..

సర్వేజనా సుఖినోభవంతు ...

ఒక ప్రేమికుడి మనో వేదన ..


ఆ కోయిల పాట విని నువ్వు పిలిచావనుకున్నా
నా నిన్నటి కలను నమ్మి నిను గెలిచాననుకున్నా
నీ అలకను చూసి నను మరిచావనుకున్నా
అయినా !!! రేపటి కోసం నీకై ఆశ తో నిలుచున్నా

కవితా సంపుటి

స్నేహితులారా .. నా కవితా సంపుటి ని మీ ముందు ఉంచుతున్నాను .. మీ విమర్శలను , సలహాలను తెలుసుకోగోరుచున్నాను ...

స్నేహం ...

వసంత మాసం లో కోయిల గొంతులో ఎంత మాధుర్యం ఉంటుందో
నిండు పున్నమి రోజు పండు వెన్నెల ఎంత హాయిగా ఉంటుందో
తొలకరి చినుకుకి విరిసిన పువ్వులు ఎంత ఆనందం గా ఉంటాయో
స్నేహపు జల్లులో తడిసిన మనసులు కూడా అదే మాధుర్యాన్ని , అదే హాయిని , ఎంతో ఆనందం గా పంచుకుంటాయి


ఆశ ...

ఆ కోయిల పాట విని నువ్వు పిలిచావనుకున్నా
నా నిన్నటి కలను నమ్మి నిను గెలిచాననుకున్నా
నీ అలకను చూసి నను మరిచావనుకున్నా
అయినా !!! రేపటి కోసం నీకై ఆశ తో నిలుచున్నా


మన దేశం ...

నా సర్వ స్వాతంత్ర్య లౌకిక ప్రజాస్వామ్య గణ తంత్ర సామ్యవాద భారతావని లో
నేను అనే స్వార్థం నాట్యం చేస్తుంటే ..
మేము అనే మత మౌడ్యం మెలికలు పెడుతుంటే
మాది అని కుల తత్వం కుతంత్రాలు చేస్తుంటే
మానవత్వమన్న మాట కికడ మనుగడ కరువే కదా
మంచి మనసున్న మనుషుల కికడ బ్రతుకు బరువే కదా ..


గెలుపు ..

ఓ విద్యార్థి ..
మనసు లోని భావాలను మాటలలో తెలుపు
మనకు ఉన్న నమ్మకాన్ని చేతలలో చూపు
వయసుకున్న ఉత్సాహాన్ని మేధస్సు తో కలుపు
మన కోసమే వేచి ఉంది మరపు రాని గెలుపు